Scelta Lingua



Menu di Navigazione

Ricerca

Ricerca rapida

ricerca avanzata


 Comunitât Culinâr dal Friûl > Comunitât Culinâr > Storie dal Consorzi

Tra croniche e realtât...

foto storica
 

La Comunitât Culinâr dal Friûl, organisim consortîl, ideât cun savie prevision dal so prin president Titta Metus, al è stât costituît ai 16 di Avrîl dal 1967, cun at notarîl specific, sotscrit li de ale di soreli a mont dal Cjistiel di Colorêt di Montalban, concedût cun cortesie pe ocasion dal cont Alessandro Ricardi di Netro par dâ plui solenitât ae cerimonie de nassite di chê che in chê volte e jere la uniche e origjinâl realtât aministrative sorecomunâl de Regjon Friûl Vignesie Julie.

I prins Comuns che a vevin dât la lôr  adesion a jerin stâts stâts: Buie, Cjassà, Colorêt di Montalban, Cosean, Dignan, Feagne, Maian, Martignà, Morùs, Osôf, Paulêt, Ruvigne, Rivis Darcjan, Sant Denêl, Sant Vît di Feagne e Trep Grant.

 

foto storica
 

Cu la aprovazion dal prin statût, si previodeve la gjestion in forme associade di diviers compits e servizis di istitût che i singui Comuns, o no vevin ancjemò istituît o no jerin tes cundizions economichis di gjestî di bessôi; anticipant in chest mût di plui di vincj agns chest che il Stât al disponarà cuntune leç tal 1990.
Titta Metus in chê volte al jere conseîr regjonâl e cun chê incarghe al à vût cirût di informâ e di sensibilizâ la realtât istituzionâl e economiche produtive dal Friûl Vignesie Julie de dibisugne dal metisi adun tra ents locâi pe creazion dal auspicât e tant contrastât “Comprensori”.
Dopo diviersis vicendis la Regjon e à concedût il ricognossiment juridic cun decret n. 54 dai 27 di Mai dal 1970, che al istituive la “Comunitât Culinâr dal Friûl” tant che consorzi volontari di chescj 13 Comuns: Cjassà, Colorêt di Montalban, Dignan, Feagne, Forgjarie, Maian, Morùs, Osôf, Ruvigne, Rivis Darcjan, Sant Denêl, Sant Vît di Feagne e Trep Grant. Buie e Cosean a son jentrâts dopo.
La gnove realtât consortîl si indotarà di un statût plui adat cun largjis previsions di finalitâts e di obietîfs, e ancje servizis sociâi di gjestî in forme associade. La gnove assemblee formade dai Sindics e di doi delegâts par Comun, un di de minorance, dade dongje tal Municipi di Colorêt, dulà che e jere stade fissade la sede legâl, e à confermât la presidence di Titta Metus e e à nomenât doi vicepresidents: Ferruccio Munari, conseîr di Feagne e Giovanni Melchior, Sindic di Rivis Darcjan.
Dal 1970 al 1975 il consorzi al à fat nassi diviersis iniziativis, istituint la segretarie, i uficis aministratîfs e l'ufici tecnic urbanistic che, indotâts di personâl, a judavin i Comuns cence tecnic comunâl, fasint tacâ la progjetazion di tantis oparis publichis: fognaduris, depuradôrs, cimitieris, ambulatoris, puints e stradis e altris oparis di competence comunâl. Cun di plui al è stât frontât il probleme de racuelte e dal smaltiment dai refudums solits urbans e la costruzion dal grant centri sociâl - cjase di  polse di Feagne, progjetât par servî dut il teritori culinâr.

foto storica
 

Dopo des elezions aministrativis dal 1975 che a àn puartât al rinovament de Assemblee, daûr de rinunzie di Titta Metus, i components a àn elet president Giovanni Melchior che, cun vivôr, al è lât indevant su la linie za segnade e parie cul consei diretîf al à metût lis fondis par cjapâ ancje lis funzions dal Consorzi Sanitari, in  spiete che la riforme dal setôr e sclarìs lis strategjiis in materie.
Tal stes timp l'ufici tecnic e aministratîf cun dut il personâl al jere stât trasferît a Palaç Roncjis metût a disposizion a gratis de Aministrazion Comunâl di Sant Denêl dal Friûl, viodût che il spazi a disposizion a Colorêt nol bastave.
Par viodi dal probleme dai spazis, prime, i orghins aministratîfs de Comunitât a vevin deliberât di comprâ l’ex cine “Dal Pin” di Maian, che si voleve ristruturâ par destinâlu tant che sede definitive de Comunitât. La sere dai 6 di Mai dal 1976 e jere stade clamade a Maian la assemblee par discuti il probleme dal Consorzi Sanitari: pôc dopo des nûf di sere... al è rivât il taramot che al à scjassât dut il Friûl e cun chest grande part dai Comuns consorziâts, po dopo declarâts disastrâts o cun dams seris.
Di in chê volte a son passâts plui o mancul trente agns, ma il ricuart di chei moments al è ancjemò vîf in ducj.
Il Consorzi, tant che ancje i comuns, al jere impreparât a frontâ chel disastri fûr di misure, ma al à cirût di fâ miôr che al podeve la sô part di coordenament istituzionâl tra il nivel comunâl, plui operatîf e i nivei sore ordenâts de Regjon e dal Stât.
Passade la emergjence dal daspò taramot, e je stade infuartide la azion par justâ il statût dal consorzi ae pussibilitât di cjapâ la gjestion direte dai presidis sanitaris che a son tal teritori. Modificazion acetade e fate buine cun decret regjonâl ai 30 di Mai dal 1977.
Il proviodiment al à permetût di zontâ ancje l’Ospedâl di S. Denêl tra i associâts; ent che al à nomenât i siei delegâts dentri de assemblee. Cussì al è stât inviât, dal diretîf rinovât, il servizi di assistence a domicili ai anzians e no autosuficients, integrantlu cul Servizi Sanitari dal teritori e cjapant diviers personâl par assisti lis categoriis plui debilis, ancje i disabii, al à istituît il laboratori che ur è dedicât, prime cun sede a Maian po dopo a Feagne e al à modificât la cjase di  polse in mût di rispuindi aes dibisugnis de utence, aromai diviersis.

foto storica
 

Lis funzions di Consorzi Sanitari de Comunitât a son cessadis cu la jentrade in vore de leç 833/1978 di riforme de sanitât statâl, tal 1980.
La esperience e i servizis inviâts a scjale teritoriâl a son stadis in ogni câs lis cundizions pe costituzion dal Unitât Sanitarie Locâl di San Denêl, che e cjape dentri scuasi ad in plen il teritori dai Comuns consorziâts.
 Un moment di impuartance politiche particolâr al è stât a pene dopo dal taramot, cuant che la assemblee dal consorzi e à nomenât trê components a timp plen che àn judât il president de Comunitât tal sfuarç di coordenâ lis diviersis iniziativis leadis cu la ricostruzion e cul disvilup dal teritori. In chest mût si à inviât une esperience cualificante che e à fat capî la impuartance di dâ dongje lis fuarcis par meti in vore dutis chês sinergjiis tra i varis nivei istituzionâi tal puartâ indevant la ricostruzion programade.
In chê volte al è stât potenziât l'ufici tecnic, costituît l'ufici gjeologjic e cul inviament dal ufici di plan a son stâts coordenâts i intervents ufierts de Regjon Piemont, che e à metût a disposizion dal Consorzi cierts docents dal Politecnic e de Universitât di Turin che a àn metût sot tancj laureâts e daûr a laureâsi, dopo cjapâts dentri te progjetazion e tal recupar dai edificis scolastics vuastâts dal taramot e finanziâts dai fonts racuelts dal cuotidian “La Stampa”.
La scuadre piemontese, coordenade de Regjon, e à prontât un so Plan di Ricostruzion e Disvilup de aree taramotade de Comunitât che al è stât presentât ae Academie des Siencis di Turin dal prof. Norberto Bobbio in presince di tantis autoritâts politichis locâls e regjonâls.
Une sielte juste e ben intivade pal ent consortîl, in chei agns, e je stade chê di comprâ la ale di soreli a mont dal Cjistiel di Colorêt. Cuant che sul tacâ dal 1978 il cont Ricardi di Netro al veve proponût che si compràs la sô proprietât, al è stât scrit  daurman un preliminâr e deliberât chest acuist pe sume, une vore conveniente, di 80 milions, cjapadis dentri dutis lis spesis, metint in chest mût lis fondis par  une sede definitive e di lustri.
Dopo rinovadis lis aministrazions comunâls tal 1980 e nomenâts i gnûfs delegâts, sul tacâ dal an gnûf si è definide  une gnove maiorance politiche che e à confermât tant che president Giovanni Melchior.
Il Diretîf al fasè come so impegn primari il fâ rivâ il metan in dut il teritori, stimant chest impuartant servizi a rêt une moderne e plui “nete” font energjetiche, sedi pes ativitâts produtivis che pal riscjaldament des cjasis. Cjapâts i prins contats cu la societât Italgas di Turin, che si veve za declarade a disposizion par progjetâ la opare, e individuade la font di finanziament cui fonts F.I.O. de Bancje Europeane dai Invistiments, po dopo e je stade stipulade une convenzion di pueste cu la Italgas stesse pe gjestion trentenâl dal servizi. Dute la rêt e je stade fate in cinc agns, puartant un grant benefici a ducj i Comuns de aree.

foto storica
 

Tal Mai dal 1986, dopo plui di 10 agns, Giovanni Melchior al lassarà la presidence dal consorzi, al cjaparà il so puest il zovin Sindic di Colorêt di Montalban, Roberto Molinaro.
Cu la presidence di Molinaro al è stât fat, tra chês altris robis, il “Program Straordenari” previodût de L.R. 70/1983, pal recupar ambientâl e pal disvilup dal teritori; intervignint in trê zonis umidis di impuartance strategjiche: lis risultivis dai Bârs a Osôf, il lât di Ruvigne e metint sù il centri avi faunistic li de Oasi dai Cuadris di Feagne e su trê rilêfs di impuartance storiche ambientâl, la Mont di Muris, il Cuel di Osôf e metint in vore il complès recupar urbanistic e ambientâl de Mont di Buie. Tal stes contest si son metûts in vore i lavôrs de Oasi naturalistiche dai prâts di Côç a Flaiban e completade la planificazion dal grant Parc Comprensoriâl di Mont di Prât tal Comun di Forgjarie.
A son stâts completâts ancje i lavôrs infrastruturâi programâts de strade intercomunâl di “Sotbosc” tra Maian e il Ciman, la struture di prin acet tal Atelier par disabii a Feagne e il recupar de ale di soreli a mont dal Cjistiel di Colorêt, che e deventarà sede definitive dal consorzi e e vignarà inaugurade tal Avrîl dal 1994.
Cun di plui e je stade tornade a meti sù, in chei agns, la Mostre dal Artesanât Culinâr, rassegne inmaneade vie pal Festival di Maian, sospindude dopo dal taramot par mancjance di spazis idonis.
La leç 142 dal 1990, za citade prime, e à mudât l'implant juridic des autonomiis locâls e alore la nature dai Consorzis di Comuns associâts pe gjestion dai servizis di  istitût, tant che la Comunitât Culinâr che za prime e veve metût dentri ciertis modificazions inovativis, po dopo fatis obligatoriis.
Ducj i Comuns che a aderissin al consorzi, che cu la adesion tal 1983 di Flaiban a jerin rivâts a 16, a àn vût di fâ bon un statût gnûf e  un scheme di convenzion pe gjestion  associade di cierts compits di  istitût, ancje se a jerin servizis che lôr a vevin za inviât.

castello di Colloredo
 

La normative introdusude e à modificât la composizion de Assemblee dal Consorzi parcè che e proviôt che a sedin i Sindics a rapresentâ i ents elementârs che a metin adun il Consorzi, mintri il Consei di Aministrazion al à di sei fat di elements che no son des Aministrazions associadis, cjapant dentri ancje il President.

Daspò de jentrade in vore di chescj proviodiments il President Molinaro, elet ancje te assemblee regjonâl, al à scugnût lassâ a Setembar 1993 la presidence dal Consorzi.
Il gnûf statût al à une clausule, e su la fonde di cheste la presidence de Assemblee dai Sindics e ven dade di volte a rotazion par un an, ancje se si pues rinovâ. Il prin a jessi a cjâf dal gnûf organisim al fo l'ex president e Sindic di Rivis Darcjan Giovanni Melchior, parcè che al jere l'aministradôr plui vieli tra i coleghis de Assemblee.
La carghe e jere stade davuelte prime di: Adriano Piuzzi (Maian), Tullio Picco (Dignan), Paolo Menis (San Denêl), Giordano Menis (Trep Grant), Aldo Calligaro (Buie), Varutti (San Vît di Feagne), Guglielmo Biasutti (Forgjarie), Adriano Piccoli, Sindic di Cosean e Claudio Zonta, Sindic di Maian.
Il Consei di Aministrazion, fat di 5 components, dal 1995 al 2000 al è stât direzût di Ennio Benedetti (Colorêt di Montalban) sostignût dai conseîrs: Copetti, De Sabata, Serafini e Zampieri. Dal 2000 al 2004, cu la conferme di Benedetti ae Presidence e di Copetti come conseîr, a son jentrâts: Lorenzo Cozianin, Renzo Scarso e Elia Tomai.
Dal Setembar 2004 al 2006 il Consei di Aministrazion al è stât rezût di Tullio Picco (Dignan) e dai cuatri conseîrs: Sergio Benedetti (Flaiban), Lorenzo Cozianin (Ruvigne), Giovanni Fabbro (Buie) e Elia Tomai (Feagne).
Tal ultin deceni di ativitât il Consorzi si è man man impegnât tal potenziâ i servizis ambientâi: difese dal teren, tutele des aghis e gjestion dal procès di recupar e smaltiment dai refudums; te ativazion di gnûfs servizis, metint in pîts i uficis: Cartografie, Tribûts, Gjestion Associade dal Personâl e tal inviâ une politiche programade di disvilup de ativitât culturâl e di turisim dal Friûl Culinâr par mieç de istituzion dal Servizi Associât Culture.

Tal 2007 in linie cu la L.R. n.1/2006 cu la gnove legjislazion regjonâl di riforme des autonomiis locâls i prins citadins di cutuardis Comuns za dal Consorzi de Comunitât Culinâr dal Friûl a àn tornât a confermâ il lôr sodalizi firmant la gnove convenzion e il gnûf Statût dal Ent. A meti la lôr firme sul document notarîl si son presentâts Luca Marcuzzo (Buie), Ennio Benedetti (Colorêt di Montalban), Adriano Piccoli (Cosean), Giambattista Turridano (Dignan), Gianluigi D'Orlandi (Feagne), Stefano Fabbro (Flaiban), Claudio Zonta (Maian), Carletto Dreosso (Murùs), Luigino Bottoni (Osôf), Gabriele Contardo (Rivis Darcjan), Gino Marco Pascolini (San Denêl), Carmen Micoli (San Vît di Feagne) e Giordano Menis (Trep Grant). Daspò al è jentrât tal Consorzi Culinâr ancje il Comun di Forgjarie, che al è soci  dal imprin, puartant la adesion a 15 Comuns associâts.
Chescj impuartants documents a inzornin la realtât istituzionâl dal Consorzi "Comunitât Culinâr dal Friûl" ae gnove figure de associazion intercomunâl cu la cualifiche di Ambit pal disvilup teritoriâl (A.S.TER) e e met intindiments, finalitâts e obietîfs.
Par rivâ ai intindiments dal statût, il Consorzi al propon di aumentâ la integrazion tra i siei associâts pe gjestion des funzions e dai servizis dentri dal teritori, cun particolâr atenzion ae valorizazion socio economiche dal comprensori. Dilunc l'an 2008 a son stâts ativâts gnûfs servizis cu la istituzion dal Ufici Unic de Polizie Municipâl in gjestion associade cun 9 Comuns, daspò disfat tal 2010, l'Ufici Unic Suap-Cumierç-Polizie Aministrative cun sede distacade culì dal Comun di San Denêl e il Sportel Europe pe progjetazion comunitarie.
Dal 2006 al 2013 il Consei di Aministrazion al è stât vuidât da Lorenzo Cozianin (Ruvigne) e dai conseîrs: Sergio Benedetti (Flaiban), Giovanni Fabbro (Buie) , Antonio Zuliani (Forgjarie) e Elia Tomai (Feagne). Al 23 di Dicembar dal 2011 al è stât firmât, cu la Societât A&T2000 spa, l'at di aument di capitâl cu la cession di complès aziendâl relatîf al singul braç di aziende, a scomençâ dal prin di Zenâr dal 2012. Chest at al à puartât al trasferiment ae Soc.A&T2000 spa dal branc dai refudums de Culinâr. Tal 2011 si è sierade la gare pal afidament dal servizi di distribuzion dal gas, par un periodi di dodis agns, tai teritoris dai comuns consorziâts. La adiudicazion e je stade fate buine de Societât AMGA s.p.a. cun sede a Udin. Ai 23 di Dicembar 2011 al è stât firmât, con la societât A&T 200 spa, l'at di aument di capitâl cu la cession di complès aziendâl relatîf al singul braç di aziende, a scomençâ dal prin di Zenâr dal 2012. Chest at al à puartat al trasferiment ae societât A&T 2000 Spa dal branc refudums de Culinâr. Cheste operazion e à puartât pe Comunitât Culinâr dal Friûl une fuarte diminuzion dal so cont economic.

Il 12 di Jugn dal 2013, il Statût al è stât inzornât ae L.R. 3/2012 art.5 come 13. E ven identificade come "lûc istituzionâl" dulà disvilupâ la programazion di intervents, progjets e azions integradis di valence sorecomunâl. Dal 2013 a vuê il Consorzi Comunitât Culinâr dal Friûl al è rezût di Giambattista Turridano (za Sindic di Dignan), dal Vice President Gabriele Contardo (za Sindic di Rivis Darcjan) e dai Conseîrs cun deleghe Ida Copetti (Vice Sindic di Osôf), Pierluigi Molinaro (Sindic di Forgjarie) e Fabio Spitaleri (cjâf grup di maiorance dal Comun di San Denêl). Dilunc l'esercizi 2014 la ativitât dal Ent si è concentrade soredut tal insaldâ la gjestion dal servizi public di distribuzion dal gas-metano tal teritori culinâr fidât ae Societât AMGA spa di Udin, par un periodi di 12 agns a front di un canul di scuasit Euro 1.000.000,00 ad an. Il gjestôr in jessude Societât Italgas spa al à presentât ricors al TAR cuintri la Culinâr, domandant l'anulament dal contrat di afidament dal servizi a Amga spa. Il TAR in date 25/01/2012, in spiete di judizi di merit, al à mandât indaûr la istance di sospension dal contrat presentade da Italgas. Daspò Italgas SPA al à fat ricors al Consei di Stât par l'anulament de ordenance dal 25/01/2012. Chest apel al è stât mandât indaûr. In dì di vuê si è in spiete dal judizi di merit pendant devant dal TAR. L'AMGA spa tal 2014 al à perfezionât la fusion adun cun Hera spa di Bologne.

Cu la aprovazion de L.R. 26 dal 12 di Dicembar dal 2014 e modifichis seguitivis al è proviodût il riordin dal sisteme Regjon-Autonomiis Locâls dal Friûl Vignesie Julie, introdusint lis Unions Teritoriâls Intercomunâls (UTI) e proviodint a la ricolocazion di funzions aministrativis. In particolâr l'art.40 de L.R. 26/2014 al proviôt la pussibilitât che la Comunitât Culinâr dal Friûl e deventi Union e la composizion di cumò no vedi di subî modifichis.